दिपायल । भौतिक पूर्वाधार तथा यातायात मन्त्री देवेन्द्र दाहालले डोटीको बानेडुंग्रीसैनअन्तर्गत सातनाली सडकखण्डमा निर्माणाधीन पक्की पुल समयमा नै सम्पन्न गर्ने निर्देशन दिएको बताएका छन्।
आज प्रतिनिधि सभामा डोटीबाट निर्वाचित सांसद प्रेमबहादुर आलेले शून्य समयमा गरेको ध्याकर्षणको जवाफ दिँदै मन्त्री दाहालले सो कुरा बताएका हुन्।
यसअघि यही फागुन ४ गते प्रतिनिधि सभाको शून्य समयमा बोल्दै सांसद आलेले डोटीको बानेडुंग्रीसैनअन्तर्गत सातनाली सडकखण्डमा निर्माणाधीन पक्की पुल ठेक्का लागेको १० वर्षसम्म पनि २५ प्रतिशत काम मात्र सम्पन्न नभएको बताउँदै असन्तुष्टि व्यक्त गरेका थिए।
उनले पुल निर्माणका लागि ८० लाख रुपैयाँ बजेट विनियोजन भइसकेको भए पनि ठेकेदारले काममा सक्रियता नदेखाउँदा पुलको काम अलपत्र परेको गुनासो राखेका थिए।
उक्त कुराको जवाफ दिँदै मन्त्री दाहालले आफ्नो ध्यानाकर्षण भएको बताएका थिए। उनले भने, “यस कुरामा ध्यानाकर्षण भएको छ। यो आयोजनाको तत्काल निर्माण कार्य अगाडि बढाई समयमा सम्पन्न गर्ने प्रतिबद्धता ब्यक्त गर्ने चाहन्छु। समयमै सम्पन्न गर्ने निर्देशनसमेत दिइएको छ।”
उक्त पुल निर्माण कम्पनी पुष्प राजेन्द्र जेभी हो। निर्माण व्यवसायी कम्पनी पुष्प राजेन्द्र जेभीका सञ्चालक भीमबहादुर साउद डडेल्धुरा कांग्रेस जिल्ला सभापति हुन्। उनले उक्त आयोजना राजनीतिक आडमा अलपत्र पारेको स्थानीयको आरोप छ।