मङ्सिर २०, डोटी
डोटीको शिखर नगरपालिका–६ तिलतालि स्थित सेती नदीमा गत महिना एक नवजात शिशुको बेवारिसे शव फेला पर्यो । कात्तिक १ गते बुधवार साँझ सेती नदीमा पानी जमेको ठाउँमा ८/९ महिनाको जस्तो देखिने शव फेला परेको थियो ।
उक्त नवजात शिशु फेला परेको ४९ दिन बितिसकेको छ । अझै पनि शिशु कसले, किन र कसरी फालेको हो भन्ने भन्ने बारे कुनै तथ्य फेला परेको छैन । शिशुको शव जिल्ला अस्पताल डोटीको शव गृहमा राखिएको छ । शिशुको शव व्यवस्थापन गर्नतिर कसैको ध्यान गएको देखिँदैन ।
जिल्ला प्रहरी कार्यालय डोटीका प्रहरी प्रमुख, प्रहरी उपरीक्षक विष्णुहरि कोइरालाकाले यस घटनामा प्रहरीले गर्नुपर्ने सबै प्रक्रिया पुरा भएको बताए । उनले भने, ‘शिशु कसले र किन फाल्यो कारण पत्ता लाग्न सकेको छैन, शवको पोस्टमार्टम गरिएको छ ।’ शवको व्यवस्थापन गर्ने कार्य प्रहरीको नभएको र शव व्यवस्थापनका लागि आवश्यक कार्य गर्न शिखर नगरपालिकालाई अगाडी नै पत्र पठाएको प्रहरी प्रमुख कोइरालाले बताए ।
पहिचान नभएका तथा बेवारिसे शव व्यवस्थापन निर्देशिका २०७८ मा जिल्लामा प्रमुख प्रहरीको अध्यक्षतामा पहिचान नभएका तथा बेवारिसे शव व्यवस्थापन जिल्ला समिति गठन हुन्छ । निर्देशिकामा पहिचान नभएका तथा बेवारिसे शवलाई सम्बन्धित प्रहरी कार्यालयले समितिको निर्णय बमोजिम स्थानीय जनप्रतिनिधि तथा सम्बन्धित क्षेत्रका सामाजिक सङ्घसंस्थाको रोहवरमा स्थानीय तहको समन्वयमा अन्त्येष्टि गरी सोको विवरण राख्नुपर्ने उल्लेख छ । शव व्यवस्थापनमा लाग्ने खर्च सम्बन्धित स्थानीय तहले सम्बन्धित प्रहरी कार्यालयको समन्वयमा गर्नुपर्ने हुन्छ ।
तर शव भेटिएको स्थान शिखर नगरपालिकाका नगरप्रमुख दीर्घ बहादुर बलायरले शव व्यवस्थापन गर्ने काम आफूहरूको नभएको बताए । प्रमुख बलायरले व्यवस्थापनका लागि आवश्यक सहजीकरण गर्न सक्ने भए पनि शवको व्यवस्थापन गर्ने पाटो आफ्नो नभएको बताए । यता जिल्ला अस्पताल डोटीका व्यवस्थापन समिति अध्यक्ष धन बहादुर नेपालीले शवको समयमै व्यवस्थापन नहुँदा समस्या हुने स्थिति सिर्जना भएको बताए । अस्पतालमा शव राख्नको लागि दुई ओटा मात्रै मर्चुरी फ्रिज रहेको र दुई ओटैमा शव हुनाले अर्को थप शव आएमा समस्या हुने अध्यक्ष नेपालीले बताए ।
