डोटी : त्रिवेणी मिडिया नेटवर्क डोटीद्वारा सञ्चालित सामुदायिक रेडियो त्रिवेणी एफएम ९४.४ मेगाहर्ज सिलगढी डोटीले सञ्चालन गरेको कार्यक्रम तिज सुपर धमाकाका उत्कृष्ट सहभागीलाई पुरस्कार वितरण गरिएको छ ।
रेडियोले साउन १४ गते देखी भदौ १४ गतेसम्म रेडियोबाट सञ्चालन गरेको कार्यक्रममा नियमित सहभागी भई उत्कृष्ट चारमा पर्न सफल सहभागीलार्ई उपहार प्रदान गरिएको हो । शनिवार उत्कृष्ट चारमा पर्न सफल बोगटान फुड्सिल गाउँपालिका ७ चवाराचौताराकी सोनिया परियार, शिखर नगरपालिका १ कपल्लेकीकी दिपा नागरी र केआइसिंह गाउँपालिका वडा नम्बर २ की लक्ष्मी विकलाई सम्मान स्वरूप प्रमाण पत्र र चादिको सिक्री उपहार दिइएको त्रिवेणी एफएमका स्टेसन म्यानेजर खगेन्द्र सिंहले बताए । पुरस्कार वितरण गर्दै कार्यक्रमका उत्कृष्ट सहभागीलाई उज्ज्वल भविष्यको कामना गर्दै आगामी दिनमा पनि रेडियोले सञ्चालन गरेका कार्यक्रममा नियमित सहभागी हुन म्यानेजर सिंहले आग्रह गरे ।
कार्यक्रममा चार जना उत्कृष्ट भएका भए पनि अछामकी सिर्जना क्षेत्री उपस्थित नभएको र उपस्थित भएमा उपहार प्रदान गरिने रेडियोका समाचार प्रमुख तथा तिज सुपर धमाका कार्यक्रमका प्रस्तोता किरण धामीले बताए । पुरस्कार ग्रहण गर्दै उत्कृष्ट सहभागीले खुसी व्यक्त गरे ।
